ក្នុងវេទិកាជួបជុំ Startup Weekend Cambodia (SWC) កាលពីចុងសប្ដាហ៍នេះនៅអាគារ Yellow Tower យុវវ័យខ្មែរពីរក្រុមបានដណ្ដើមជយលាភីលេខ ពីរ និងលេខបី ក្នុងការលើកគំនិតដ៏ល្អជាងគេក្នុងការអភិវឌ្ឍកម្មវិធីប្រើប្រាស់នៅលើគេហទំព័រ និងក្នុងទូរស័ព្ទដៃ។
ការផ្តល់ចំណាត់ថ្នាក់នេះ ធ្វើឡើងដោយគណៈកម្មការអន្តរជាតិចំនួន ៦ រូបដែលមានបទពិសោធន៍និងធ្លាប់ឆ្លងកាត់ការធ្វើអាជីវកម្មលើវិស័យបច្ចេកវិទ្យា រយៈពេលជាច្រើនឆ្នាំ។
លោកបេ ចន្រ្តា អ្នកទទួលបន្ទុករៀបចំនិងផ្សព្វផ្សាយកម្មវិធី Startup Weekend Cambodia បានឲ្យដឹងថា លទ្ធផលនេះបានបង្ហាញឲ្យឃើញច្បាស់ពីសមត្ថភាពនិងកម្រិតនៃការយល់ដឹងរបស់យុវជនខ្មែរនៅលើវិស័យបច្ចេកវិទ្យា ដែលកំពុងមានសន្ទុះរីកចម្រើនយ៉ាងខ្លាំងនាពេលបច្ចុប្បន្ននេះ។
កម្មវិធីនេះបានកើតឡើងជុំវិញពិភពលោកតាំងពីឆ្នាំ ២០០៧ ដែលធ្វើឡើងលើកដំបូងនៅ Colorado សហរដ្ឋអាមេរិកដោយ Andrew Hyde។ សម្រាប់ប្រទេសកម្ពុជានេះជាលើកទី២ ដែលលើកទី១គឺធ្វើឡើងកាលពីខែ កញ្ញា ឆ្នាំ ២០១១។
លោក Darren Jensenអ្នកគ្រប់គ្រងកម្មវិធីបានឲ្យដឹងថា ការផ្តល់លទ្ធផលនេះដោយផ្អែកលើកត្តាមួយចំនួនដូចជា គំនិតឬប្រធានបទដែលវាគ្មិនម្នាក់ៗលើកឡើងមានលក្ខណៈពិសេស ដែលអាចឆ្លើយតបទៅនឹងតម្រូវការទីផ្សាររបស់អ្នកប្រើប្រាស់ទាំងនៅពេលបច្ចុប្បន្ននិងនាពេលអនាគត។
លោកថា ការផ្តល់ចំណាត់ថ្នាក់នេះធ្វើឡើងដោយសុក្រឹត ដោយគណៈកម្មការអន្តរជាតិដែលមានជំនាញនិងធ្លាប់ឆ្លងកាត់បទពិសោធន៍លើការងារអាជីវកម្មក្នុងវិស័យបច្ចេកវិទ្យា រយៈពេលជាច្រើនឆ្នាំ។
លោកបន្ថែមថា កម្មវិធីនេះធ្វើឡើងមិនផ្តោតសំខាន់លើការប្រកួតប្រជែងគ្នានោះដែរ ប៉ុន្តែក៏ដើម្បីចូលរួមសាងទំនាក់ទំនងនិងចែករំលែកការចេះដឹងឲ្យគ្នាទៅវិញទៅមក លើការអភិវឌ្ឍកម្មវិធីប្រើប្រាស់នៅលើទូរស័ព្ទនិងក្នុងគេហទំព័ររវាងអ្នកជំនាញខ្មែរនិងបរទេស។
លោកបញ្ជាក់ថា នេះជាលើកទីពីរដែល Startup Weekend Cambodia បានរៀបចំឡើងនៅក្នុងប្រទេសកម្ពុជា និងទទួលបានការចាប់អារម្មណ៍ចូលរួមច្រើនពីស្រទាប់យុវជនខ្មែរ អ្នកជំនួញ និងអ្នកជំនាញផ្នែកអភិវឌ្ឍន៍កម្មវិធីមកពីបណ្ដាប្រទេសនានា។ វេទិកានេះអាចជួយយុវជនខ្មែរដែលមានសមត្ថភាព អាចស្វែងរកដៃគូវិនិយោគតាមរយៈការប្រើប្រាស់ប្រព័ន្ធបច្ចេកវិទ្យាសម្រាប់ដំណើរការណ៍អាជីវកម្ម។
ក្នុងដំណើរការណ៍រយៈពេល ២ ថ្ងៃ Startup Weekend Cambodia ដែលមានការចូលរួមពីក្រុមអ្នកជំនាញមកពីប្រទេសមួយចំនួនដូចជា អាមេរិក អូស្រ្តាលី ហ្វីលីពិន សឹង្ហបុរី ម៉ាឡេស៊ី និងហុងកុងជាដើមបានសម្រេចជ្រើសរើសប្រធានបទចំនួន ៩ ក្នុងចំណោម ១៦ ដែលជាគំនិតលើកឡើងដោយវាគ្មិនជាតិនិងអន្តរជាតិទាំងនោះ ដើម្បីឡើងធ្វើបទបង្ហាញនៅចំពោះមុខគណៈកម្មការផ្តល់ពិន្ទុ។ ក្នុងចំណោម ៩ គណៈកម្មការជ្រើសរើសយកតែ ៣ ប៉ុណ្ណោះដើម្បីផ្តល់ចំណាត់ថ្នាក់ជយលាភី ដោយក្នុងនោះមានប្រធានបទពីរជាគំនិតលើកឡើងដោយយុវជនខ្មែរ។
ប្រធានបទទាំង ៣ ដែលជាប់ជយលាភីសម្រាប់វេទិកា Startup Weekend Cambodia នៅក្នុងឆ្នាំ២០១២នេះរួមមាន៖ 100 Words, JoinMe និង DressFuture។
